TULADHA ATUR PAMBAGYAHARJA PASRAH PANINGSET
Kula nuwun,
Assalamualaikum Wr. Wb.
Kawilujengan,
kamulyan minggahipun katentreman mugi tansah kajiwa saha kasarira dhumateng
hangga panjenengan sedaya dalasan kula.
Para
pinisepuh saha sesepuh ingkang satuhu kinabekten, sumrambahipun para tamu
kakung saha putri ingkang kinurmatan.
Awit
saking raos suka renaning manah saha bombonging panggalihipun
Bp........................... sekaliyan mboten kuwawi matur piyambak wonten
ngarsa panjenengan sedaya, menggah babaring atur,
kula minangka talanging basa, kinen matur wonten
ngarsa panjenengan sedaya.
Purwakaning
atur, sumangga langkung rumiyin kula dherekaken sesarengan ngaturaken raos
syukur wonten ngarsanipun
Gusti ingkang Maha Agung, ingkang sampun paring kasarasan, kawilujengan saha
katentreman dhumateng panjenengan sedaya dalasan kula, satemah ngantos dhumugi titi wanci punika,
panjenengan sedaya dalasan kula taksih saget makempal manunggal wonten ing
papan pahargyan wekdal punika kanthi
pinaringan wilujeng sedayanipun.
Para
tamu kakung saha putri ingkang kinurmatan, minangka babaring atur,
Bp.................................. kekalih lumantar kula kepareng hangambali
ngaturaken pambagya wilujeng rawuh, dhumateng sedaya para tamu kakung saha
putri, ingkang sampun kepareng lenggah wonten ing samadyaning pahargyan wekdal
punika. Maliginipun dhumateng kadang
badhe besan ingkang kinurmatan, sinareng raos panuwun ingkang tanpa pepindan,
mugi keparenga panjenengan para tamu sedaya kasuwun lelenggahan kanthi
mardikaning manah, saha
hangestreni tumapaking tatacara ngantos pari-purna.
Para
tamu ingkang winantu ing suka basuki,
lekas wekasaning sedya wigatosing gati, kepareng kula ngaturaken menggah
wigatosing atur,
nadyan panjenengan sedaya hambokbilih sampun ngawuningani gatining sedya ing kalenggahan punika, nun inggih ing nguni
Bp.................................... kekalih sampun gumolongaken rembag
kaliyan Bp.................................... sekaliyan, karana ing pangajab
sami-sami netepi
darmaning asepuh nedya ngempalaken balung apisah, ngraketaken daging arenggang ing
antawisipun Bp...............................
sekaliyan ingkang
kagungan putra asesilih Bg ............................................... saha
Bp..................................... kekalih ingkang hanggadhahi siwi putri asesilih Rr
.................................
Manunggaling
sedya ingkang sampun jumbuh, handaupaken putra badhe penganten nut satataning agami
miwah adat ingkang sampun lumampah wonten ing wewengkon mriki. Inggih awit saking sedayanipun sampun
manunggal cipta, rasa, miwah karsanipun, ing
kalenggahan punika sampun katindakaken tata upacara pasrah panampining upakarti.
Mugi-mugi
wekasing sedya saget kasembadan ingkang sami ginayuh, saha saking panyuwuning
Bp ......................................... kekalih mugi wontena jumurunging puji hastuti saking para tamu
sedaya mugi hanggenya Bp .................................. kekalih nampi
pasrah upakarti tansah manggih basuki ing sedayanipun. www.trisnosolo.com
Hambokbilih
Bp ............................................. kekalih sumrambahipun para
kulawarga hanggenipun nampi rawuh panjenengan sedaya kirang trep kaliyan palenggahan panjenengan sedaya,
awit saking punika Bp ...................................... kekalih, namung
tansah tumadhah lumebering pangaksami.
Ing
saklajengipun dhumateng
tangga tepalih, sanak sedherek lan kadang kaneman, ingkang sampun kepareng
hambiyantu saha paring kadarman ingkang arupi bandha, tenaga, penggalihan lan
rerigen sanesipun, sakestu sedaya
kalawau saget handamel entheng sesangganipun Bp
............................................. kekalih.
Mugi
kanthi kesaenan ingkang sampun panjenengan paringaken kalawau, sageta pinaringan
lelintu ingkang matikel-tikel
saking Gusti ingkang Maha Kawasa,
lan mugi-mugi dados amal sae saha
kuncaraning asma panjenengan piyambak-piyambak. Aamiin.
Para
tamu kakung saha putri ingkang winantu ing pakurmatan. Mengggah panyuwunipun
ingkang hamengku damel, mugi para tamu sedaya kersa hanglajengaken lelenggahan
ngantos dhumugi pari-purnaning pahargyan kanthi mardu mardikaning penggalih.
Wusananing
atur, kula minangka talanging basa saking ingkang hamengku gati, hambokbilih
wonten kirang saha langkungipun
anggen kula matur, kula tansah nyuwun agunging pangapunten.
Cekap
semanten, matur nuwun. www.trisnosolo.com
Wassalamualaikum Wr.
Wb.
(Sanggar Tresno Budaya)
(Sanggar Tresno Budaya)
0 komentar:
Posting Komentar